سـتـيـگ (قيد التطوير): منصة من اجل المجتمعات

منصات التواصل الاجتماعي اليوم

مشاكل منصات التواصل الاجتماعي كثيرة، وهذي المنصات هي المكان اللي نقضي بي ساعات وساعات من حياتنا، ممكن انت عايش ببغداد او بالحلة، بس انت همينه عايش على انستاكرام وتكتوك.

تقضي وقتك هناك، تعبر عن نفسك وتتواصل ويه الناس اللي تحبهم... بس اكو شغلات متكدر تسويها، نهائيا، بسبب الهياكل اللي اسست هاي المنصات:

• المساحة المفتوحة: شي مشترك بين كل منصات التواصل الاجتماعي انو اول متفتحها يطلعلك الفييد، الفييد اللي ميلتزم بانت منو متابع ولا اخبار منو تريد تعرف.

• من احنا نروح لهذي المنصات احنا نروحلها حتى نبيع الاهتمام والتركيز مالتنا الهم، وهمه يبيعوه للمعلنين، فالمنصة كلها مصممة حول هذي التجارة، مو حول اهتماماتنا ومبادئنا.

• اخير شيء واهم شيء، انو هاي المنصات مو امنة، دائما تتسرب المعلومات من عدها وتخلينا نستعمل واتساب وسيگنال من نريد نتواصل بأمان، ومع تطور الذكاء الاصطناعي هاي الخروقات الامنية راح تصير اكثر واكثر...

حتى نحل هذي المشاكل ونأسس منصة عادلة ومفتوحة، كان لازم نبني سـتـيـگ

سـتـيـگ: مصمم للتواصل

ستيك مو تطبيق تواصل اجتماعي، لا، ستيك بروتوكول يسمحلك تأسس تطبيق تواصل اجتماعي خاص بيك انت ومجتمعك!

التسجيل

بعد ما تأجر سيرفر وتأسس عليه سـتـيـگ، راح تكدر تنطي لافراد مجتمعك رمز للدخول للمجتمع:

توثيق الهوية للمشتركين يتم عن طريق هذا الرقم، ماكو ايميل، ماكو رقم تلفون، ولا اي شي، هذا ستاندارد اسمه نوستر، تكدرون تقرون عليه هنا

النشر

بالمواقع العادية، التلفون يتواصل مباشرة مع الموقع، لكن بـ سـتـيـگ، التلفون يشمر الرسالة بين سيرفرات هواية لحد ما توصل لسيرفر سـتـيـگ

بهذا الاصدار من سـتـيـگ للاندرويد سوينه عدة خاصيات: الفييد الخاص بالمجتمع، القنوات (مثل التليكرام) والمسجات الخاصة، حتى يكون اكو مساحة عامة مشتركة هي الفييد، ومساحات خاصة لكل مستخدم، هي قنواتهم الخاصة.

حساب المستخدم يحتوي المفتاح الخاص بي، القنوات مالته، والمنشورات اللي مسويها:

الادارة

ادارة مجتمع سـتـيـگ تتطلب سيرفر صغير، ممكن تدير مجتمع سـتـيـگ من حاسبة قديمة! بس اكيد اللي يهمنا هو ادارة المحتوى وحذف المحتوى الغير ملائم، الطريقة اللي ارتئينا بيها ان نرتب ادارة سـتـيـگ اي مفهوم "ادارة تعدّل فقط" لا تحذف، حتى القرارات الغير منطقية تكون موجودة بالعلن، مو مثل ميتا اللي يمسحون ويبندون حسابات بدون ما احد يحاسبهم.

مراحل التطوير

حاليا تطبيق سـتـيـگ على اندرويد هو بمرحلة التجريب، راح يصير متاح لمجموعة من الناس لاقتراح خاصيات، تسجيل المشاكل، والتفكير بتطبيقاته...

المرحلة القادمة هي تطوير تطبيق للايفون وانشاء نظام لادارة مجتمعات سـتـيـگ مريح لمدراء المجتمعات ومناسب الهم.

اذا تكدر تساعدنا بالتطوير او تحب تظل على اطلاع باخبار سـتـيـگ، تكدر تنضم لهذا المجتمع على تليكرام:

اذا تريد تقرأ اسماء التكنولوجيا والمبادئ اللي بنينا عليها سـتـيـگ، تكدر تقراها هنا: